Po ndërtonte një objekt, për qëllime fitimi, në pronë publike, në lagjen nr. 4, pa lejen përkatëse, arrestohet 42-vjeçari në Durrës.
Kontrollet intensive në terren, për evidentimin e ndërtimeve të paligjshme dhe lirimin e hapësirave publike të zëna në kundërshtim me ligjin kanë evidentuar në qytetin bregdetar një tjetër rast të ndërtimeve pa leje.
Një ditë më parë, IMT ndërhyri për largimin e kioskës me strukturë druri, të vendosur pranë hyrjes nr.4 të portit të Durrësit.
“Shërbimet e Drejtorisë Vendore të Policisë Durrës, në bashkëpunim me Policinë Bashkiake dhe me IMT, gjatë kontrolleve në terren, për evidentimin e ndërtimeve të paligjshme dhe lirimin e hapësirave të zëna për qëllime fitimi, kanë konstatuar në lagjen nr. 4, një objekt prej druri që po ndërtohej pa lejen përkatëse.
Në vijim të veprimeve për këtë rast u arrestua në flagrancë shtetasi F. B., 42 vjeç, banues në Durrës, për veprën penale “Ndërtimi i paligjshëm”, kryer për qëllime fitimi.”– njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës.
