Komisioni i Pavarur i Kualifikimit ka shkarkuar nga detyra prokurorin e e Apelit të Durrësit, Bujar Hoti.
Vendimi u mor pas hetimeve të zhvilluara nga komisioni i përbërë nga anëtarët Lulzim Hamitaj, Olsi Komici dhe relatorja Brunilda Bekteshi.
Seanca dëgjimore
Sipas relatores Bekteshi,prokurori Hoti, ka deklaruar se ka në pronësi një apartament banimi 157 m², dhe shtesë 30 m², në qytetin e Durrësit, me vlerë 4 milionë e 400 mijë lekë, i blerë me kredi.
Një automjet tip Audi A4, blerë për 6500 euro, një tokë arë 4 mijë m² në Spitall në Durrës, fituar nga ligji 7501, një zyrë noteriale me sipërfaqe 41.3 m2 dhe një shtesë prej 19.6 metra katrorë.
Për njërin nga fëmijët e Hotit është paguar një tarifë për shkollimin në Universitetin e Oxfordit, në Angli.
Nga hetimet e KPK-së, ka rezultuar se apartamenti në pronësi të Hotit prej 157 m² është porositur në vitin 2004, për një vlerë prej 70 mijë eurosh. E njëjta gjë ka rezultuar edhe për një garazh, kontrata për të cilin është revokuar. Ndërsa për apartamentin prej 157 m² ka paguar 68 mijë euro.
KPK ka arritur në konkluzionin se: Hoti ka kryer deklarim të një çmimi fiktiv shitjeje për këtë apartament. KPK ka thënë se përsa i përket 4 mijë m² tokë në Spitall, Durrës, familja e Hotit është larguar nga Qerreti në Durrës që në vitin 1990 dhe sipas ligjit, nuk duhet të përfitonte më tokë, pasi ka përfituar një banesë në Durrës.
Gjithashtu, KPK sqaron se toka nuk është tokë bujqësore, pasi ndodhet shumë pranë detit. Ne lidhje me këtë fakt KPK ka kërkuar informacion nga prefektura, por ende nuk është marrë një përgjigje.
Vetë Hoti dhe avokati, i tij kanë pretenduar se pasuria e tij është e justifikuar duke kërkuar konfirmimin në detyrë.
Edhe përfaqësuesi i Operacionit Ndërkombëtar të Monitorimit, Teo Jacobs, ka replikuar me prokurorin Hoti, ku i ka thënë se prokurori, po përpiqet të shesë një skenar panelit të KPK-së.
