Një ndjekje mjaft intensive nga rojet bregdetare në Spanjë, për pak mund të kishte përfunduar në një tragjedi, pasi anija u përplas me një varkë emigrantësh.
Siç shihet nga një video, bëhet fjalë për një ndjekje të ndodhur të dielën, më 25 gusht, pranë plazhit Orcas Colorado, në Melilla të Spanjës.
Raportohet se roja bregdetare ka tentuar t’i afrohet një skafi të vogël me motor, e cila mbante 4 emigrantë nga Afrika, mes tyre edhe një vajzë të vogël.
Varka duket se nuk ka ndalur së lëvizuri pavarësisht paralajmërimeve të autoriteteve dhe pikërisht në këtë moment anija e policisë spanjolle u kthye në të djathtë, duke u nisur drejt varkës së emigrantëve, e duke bërë që ajo të përmbyset.
Një person ka rënë në det, ndërsa siç raporton media spanjolle RTVE Noticias, nuk ka të lënduar.
Emigrantët janë kthyer tashmë në Marok nga erdhën, ndërsa një OJQ marokene ka kërkuar një hetim mbi incidentin.
Melilla është një vendkalim i ngarkuar migracioni, pasi emigrantët kalojnë prej andej në pjesën tjetër të Evropës kontinentale.
