Vizita e parë në Shqipëri, Macron pritet në ceremoni zyrtare nga presidenti Begaj

Presidenti francez Emanuel Macron ka shkuar në Presidencë, ku është pritur ne ceremoni zyrtare nga kreu i shtetit, Bajram Begaj.

Pas ceremonisë në ambientet e jashtme të institucionit shtetëror, Macron ka nënshkruar në librin e të ftuarve brenda Presidencës dhe më pas kanë nisur takimin ‘kokë më kokë’ me Begajn.

Macron e nisi vizitën e tij të parë zyrtare në Shqipëri, me dorëzimin e dekoratës më të lartë të Republikës së Francës për shkrimtarin e shquar shqiptar, Ismail Kadare. Thuajse 1 orë pas mbërritjes së tij në vend, është pritur me ceremoni në Pallatin e Brigadave, ku i dorëzoi shkrimtarit të madh shqiptar, Ismail Kadare, dekoratën më të lartë të Republikës së Francës “Oficeri i Madh i Legjionit të Nderit”.

AGJENDA E PLOTË:
8:25 -Mbërritja e Presidentit të Republikës Franceze në Institucionin e Presidentit të Republikës.
Presidenti i Republikës franceze do të pritet nga Presidenti i Republikës, Sh.T.Z. Bajram Begaj.
-Interpretohet himni kombëtar francez;
-Interpretohet himni kombëtar shqiptar;
-Kryhet kalimi para truprojës së nderit;
-Dy krerët e shteteve prezantojnë ekipet e tyre respektive.
Presidenti i Republikës së Francës ftohet të nënshkruajë në librin e të ftuarve.
Në hollin ”Nënë Tereza” do të bëhet fotoja zyrtare.
08:35 – 09:05 – Takim kokë më kokë mes dy presidentëve.