Ish-deputetja e Partisë Demokratike, Albana Vokshi i është kundërpërgjigjur kryeministrit Edi Rama në lidhje me grevën e urisë së naftëtarëve.
Përmes një postimi në Facebook, Vokshi i bën thirrje kreut të qeverisë të heqë dorë nga presionet mbi protestuesit, ndërsa shton se kushtet që iu vë kryeministri është fytyra e korrupsionit që shkatërron jetët e shqiptarëve.
POSTIMI I VOKSHIT
Edi Rama të heqë dorë nga presioni mbi gratë greviste në Ballsh. Askush s’i beson më atij, pasi ka shkelur disa herë premtimin për rihapjen e rafinerisë dhe marrjen e pagave të prapambetura.
Në 17 shtator, naftëtarët e Ballshit ishin para dyerve të qeverisë në Tiranë për të kërkuar dialog. Edi Rama nuk i përfilli. I la burra e gra të pashpresë me arrogancën e një kryeministri që nuk di çfarë do të thotë të mos kesh mundësi t’u japësh darkë fëmijëve.
Gratë greviste në Ballsh janë në të drejtën e tyre.
Harbutëria dhe cinizmi i Edi Ramës, që u vendos kushte grevisteve për t’i mashtruar prapë, është fytyra e korrupsionit që shkatërron jetët e shqiptarëve.
Edi Rama ka vetëm një rrugë me grevistët: T’u paguajë djersën e vjedhur deri në qindarkën e fundit.
