Studenti ruan kreun e renditjes në volejboll për meshkuj, në përfundim të ndeshjeve të javës së 16-të të Kampionatit Kombëtar, duke mposhtur sërish durrsakët, 10 ditë pas finales së Kupës. Kampionët në fuqi mposhtën sot në mbrëmje 3-1 Teutën në “Asllan Rusi”, një sfidë e fortë mes dy ekipesh rivale e pretendente për titull. Sukses që nuk ndryshon renditjen, ku Studenti, Vllaznia e Tirana qëndrojnë njëri pas tjetrit, me nga një pikë diferencë. Studenti, pasi fitoi dy setet e para me lehtësi, humbi të tretin, duke ulur ritmin dhe për pak sa nuk rrezikoi edhe në setin e katërt, por në fund fitoi 25-23.