Qyteti i Shkodrës i blinduar sot nga forcat e policisë për varrimin e dy vëllezërve që mbetën të vrarë dje, Astrit dhe Brahim Bilali. Ndërkohë, ceremonisë mortore mësohet t’i jetë bashkuar edhe Asmer Bilali, djali i Astrit Bilalit, i cili njihet si një nga anëtarët e grupit “Bajri”.
Asmer Bilalit i është dhënë leje nga burgu të marrë pjesë në varrim. Mësohet se të paktën 3 furgonë dhe makina të tjera policie shoqërojnë Asmer Bilalin në ceremoninë mortore.
Asmer Bilali është ish-kampioni i boksit që u arrestua si pjesë e grupit “Bajri” në ndërhyrjen e datës 6 shtator në Shkodër dhe që dyshohet se ishte edhe shënjestra e atentatit ku u vra Ferracaku hipur mbi kalë.
Asmer Bilali është ish-kampion boksi, është emër i njohur i sportit në Shkodër. Ai njihet edhe si person me precedentë penalë të mëparshëm në policinë e Shkodrës, si dhe është i dyshuari kryesor për plagosjen e Hermes Beqirit në një nga lokalet e qytetit.
Nuk dihet nëse vrasja e të atit dhe xhaxhait të tij ka lidhje me Asmerin që tashëm qëndron pas hekurave si pjesë e grupit famëkeq të Shkodrës.
