Një histori tragjike ka tronditur opinionin publik, pas zbulimit të vrasjes së 24-vjeçares palestineze Rayan Alwan në Shqipëri. E reja u gjet e pajetë, ndërsa dyshimet kryesore bien mbi prindërit e saj, të cilët dyshohet se kishin planifikuar eliminimin e saj.
Një jetë mes dhunës dhe abuzimit
Rayan Alwan dhe familja e saj jetonin në Liban në kushte të vështira ekonomike. Në moshën 16-vjeçare, ajo u detyrua të martohej me një burrë që ia gjeti e ëma, pavarësisht kundërshtimit të saj. Vetëm një vit më pas, ajo u bë nënë për herë të parë, ndërsa dhuna dhe abuzimi nga bashkëshorti i saj ishin të vazhdueshme.
Në përpjekje për t’u larguar nga kjo martesë e dhunshme, Rayan hasi kundërshtimin e prindërve të saj. Situata u përkeqësua kur ajo zbuloi se e ëma kishte një lidhje me burrin e saj. Pavarësisht presionit të familjes, ajo arriti të divorcohej dhe u largua nga shtëpia, por humbi kujdestarinë e fëmijëve sipas ligjit libanez.
Arratisja në Evropë dhe lufta për liri
Në vitin 2023, familja e saj u shpërngul në Gjermani si azilante, ndërsa Rayan arriti të largohej nga Libani në vitin 2024. Pasi qëndroi disa muaj në Greqi, ajo u bashkua me prindërit në Gjermani, por jetonte e vetme në një kamp refugjatësh. Pavarësisht përpjekjeve për të nisur një jetë të re si kamariere, ajo vijonte të përballej me dhunën dhe kontrollin e familjes, e cila i merrte pagën dhe i ndalonte lirinë.
Pasi u dashurua me një të ri nga Libani, konflikti me prindërit u përshkallëzua. Ata nuk e pranonin lidhjen e saj me një djalë të varfër dhe donin që ajo të gjente dikë me më shumë të ardhura. Rayan denoncoi dhunën e babait në polici, por më vonë e fali atë, duke mos e menduar se kjo do t’i kushtonte jetën.
Plani për vrasjen dhe zhdukja e saj
Pas denoncimit në polici, e ëma e mbajti peng duke i marrë dokumentet dhe paratë. Ajo e bindi Rayan se do ta ndihmonte të udhëtonte në Liban për t’u bashkuar me fëmijët e saj, por në fakt, plani ishte që ajo të vritej.
Në muajin shkurt 2025, Rayan u nis nga Gjermania me të atin, duke kaluar tranzit në Shqipëri. Ajo e kishte kontaktin e fundit me të dashurin e saj më 19 shkurt, ku i tregoi se ishte në aeroport dhe po shkonte në Liban. Pas kësaj, ajo humbi çdo lidhje me miqtë e saj.
Më vonë, babai i saj u kthye në Liban, ndërsa e ëma u zhduk nga Gjermania. Për të fshehur të vërtetën, ajo përhapi lajmin në Liban se Rayan kishte vdekur në një aksident në Gjermani, ndërsa refuzoi të tërhiqte trupin e saj. Miqtë e Rayan në Gjermani zbuluan të vërtetën përmes raporteve të policisë shqiptare.
Drejtësi për Rayan
Ngjarja ka shkaktuar zemërim dhe kërkesa për drejtësi. Shoqëria e Rayan kërkon që autorët të vihen para përgjegjësisë dhe trupi i saj të merret për t’u varrosur me dinjitet. Autoritetet shqiptare dhe gjermane po hetojnë më tej këtë ngjarje të rëndë, ndërsa detaje të reja priten të dalin në dritë.
