Vritet 39-vjeçari në Tiranë, Policia: U dogj një makinë, disa të shoqëruar

Mbrëmjen e së dielës një atentat me armë zjarrri ndodhi te zona e Kodrës së Diellit, ku u ekzekutua 39-vjeçari Briken Sanaj.

Policia e Tiranës ka dhënë informacion zyrtar për vrasjen, sipas së cilës, në Qafë Kashar është gjetur një makinë duke u djegur, që dyshohet se u përket autorëve të vrasjes.

Ndërkohë, janë ngritur pika të shumta kontrolli në rrugët e kryeqytetit, ndërsa disa persona janë shoqëruar në polici.

INFORMACIONI PARAPRAK I POLICISË SË TIRANËS:

Më datë 30.10.2022, te Kodra e Diellit, në rrethana ende të paqarta, është qëlluar me armë zjarri shtetasi B. S., rreth 39 vjeç, i cili ka ndërruar jetë rrugës për në spital.

Shërbimet e Policisë kanë shkuar menjëherë në vendngjarje, kanë ngritur pika kontrolli dhe vijojnë krehjen e zonës për identifikimin dhe kapjen e autorit/ëve.

Janë shoqëruar disa persona në Polici.

Në Qafë Kashar, në afërsi të një biznesi pllakash, është gjetur duke u djegur, një automjet.

Grupi hetimor po punon  për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.