Një fotoreporter është viktima e radhës e sulmeve ruse në Ukrainë, që vazhdojnë pa ndërprerje në ditën e 38-të.

Maks Levin, babai i katër fëmijëve u vra në kryeqytetin ukrainas, Kiev, sipas zyrtarëve vendas.

Levin u zhduk më 13 mars teksa ishte në krye të detyrës, ndërsa trupi i tij u gjet ditën e djeshme në fshatin Huta-Mezhyhirska, raporton Sky News.

Shefi i fotografit tha se ai ka qenë i shoqëruar me një gazetar tjetër, Alexei Chernyshov. Deri më tani nuk ka një informacion për vendodhjen dhe gjendjen shëndetësore të gazetarit.

Më 23 mars, në Kiev u vra dhe gazetarja Oksana Baulina, teksa po filmonte shkatërrimin pasi trupat ruse bombarduan rrethin Podolsk të Kievit.

Më herët, më 13 mars, ish-gazetari i “New York Times”, Brent Renaud u vra nga rusët në Irpin, ndërsa dy gazetarë të tjerë që ishin me të mbetën të plagosur.