Mbrëmjen e së martës në Bruksel u takuan liderët e Ballkanit Perëndimor në një darkë jo zyrtare me ftesë të shefes së Politikës së Jashtme të BE, Federica Mogherini.
Të pranishëm ishin Presidenti i Kosovës Hashim Thaçi, ai i Serbisë Aleksandar Vuçiç, Presidenti i Malit të Zi Gjukanoviç, Kryeministri i Maqedonisë së Veriut Zoran Zaev dhe anëtarët e Presidencës së Bosnje-Hercegovinës.
Darka jo formale ishte një takim lamtumire nga Mogherini, e cila përfundon mandatin në dhjetor të këtij viti.
Kjo darkë nuk kaloi pa batuta mes Presidentëve Vuçiç e Thaçi. Teksa kreu i shtetit të Kosovës u përqafua me Mogherinin për t’i dhënë lamtumirën, Presidenti Aleksandar Vuçiç komentoi në gjuhën serbe: “Hashim, Federica preferon më shumë të të puthë ty”.
Nga Presidenti i Kosovës nuk pati reagim, ndërsa Vuçiç vazhdoi përsëri: “Thaçi pretendon sikur nuk kupton serbisht, por e flet shumë mirë”.
Këto batuta të Aleksandar Vuçiç në darkën jo zyrtare janë zbardhur nga mediat serbe.
Në këtë takim mungoi Kryeministri Edi Rama për shkak të angazhimeve, pasi ditën e djeshme ndodhej për vizitë në Greqi.
