Policia ka zbardhur katër raste vjedhjesh në banesa në zonën e Kavajës dhe Golemit, ndërsa është vënë në pranga autori i dyshuar, një 31-vjeçar me precedent penal.
Sipas hetimeve, i riu kishte kryer tre nga vjedhjet ndërkohë që ishte në kërkim për një tjetër ngjarje kriminale në Tiranë. Ai dyshohet se gjatë muajve shkurt dhe mars 2026 ka vjedhur orendi, pajisje dhe sende me vlerë në katër banesa.
Nga verifikimet rezultoi se 31-vjeçari ishte shpallur në kërkim për një vjedhje me dhunë të ndodhur më 17 mars në Tiranë, ku në bashkëpunim me një tjetër person i kishte marrë një 28-vjeçari dy celularë dhe një shumë parash.
Njoftimi i plotë:
Kavajë/Zbardhen 4 raste të vjedhjes në banesa, kapet dhe vihet në pranga autori i dyshuar, me precedent për vjedhje.
31-vjeçari i kreu 3 nga vjedhjet ndërkohë që ishte në kërkim për një vjedhje me dhunë të kryer në Tiranë.
Si rezultat i punës intensive hetimore që kryhet për zbardhjen e vjedhjeve, identifikimin dhe kapjen e autorëve, shërbimet e Komisariatit të Policisë Durrës, bazuar dhe në informacione të siguruara në rrugë operative, zbardhën disa vjedhje të kryera gjatë dy muajve të fundit dhe identifikuan autorin e dyshuar, shtetasin:
-T. H., 31 vjeç, banues në Skrapar.
Nga hetimet dyshohet se ky shtetas, gjatë muajve shkurt dhe mars 2026, ka vjedhur orendi, pajisje dhe sende me vlerë, në 4 banesa, në Golem dhe Kavajë.
Nga verifikimet rezultoi se ky shtetas ishte shpallur në kërkim nga Komisariati i Policisë Nr. 4, Tiranë, për veprën penale “Vjedhja me dhunë”, kryer në bashkëpunim, pasi dyshohet se më datë 17.03.2026, në bashkëpunim me një tjetër shtetas, i ka vjedhur me dhunë një 28-vjeçari, 2 celularë dhe një shumë parash.
Veprimet procedurale për ndalimin e këtij shtetasi u kryen nga strukturat e DVP Tiranë.
Materialet procedurale iu referuan Prokurorisë së Durrësit, për veprime të mëtejshme, për veprën penale “Vjedhja”, kryer më shumë se një herë.
