Presidenti i Ukrainës, Volodymyr Zelensky, ka deklaruar se ushtria ukrainase ka kapur dy ushtarë me origjinë kineze, të cilët po luftonin përkrah forcave ruse në rajonin lindor të Donetskut.
Sipas Zelensky, përplasja ndodhi pranë fshatrave Tarasivka dhe Bilohorivka, ku u përfshinë gjashtë persona të dyshuar si ushtarë kinezë, dy prej të cilëve u arrestuan nga trupat ukrainase. Ai pretendon se në forcat ruse mund të jenë përfshirë një numër i konsiderueshëm ushtarësh kinezë.
Zelensky ka urdhëruar kontakt të menjëhershëm diplomatik me Kinën për të kërkuar sqarime. Deri më tani, Pekini nuk ka dhënë asnjë reagim zyrtar.
Kreu i shtetit ukrainas tha se, nëse këto informacione konfirmohen, Kina mund të jetë vendi i tretë që mbështet ushtarakisht Rusinë, pas Iranit dhe Koresë së Veriut. Ai shprehu shqetësimin se ndihma nga partnerët ndërkombëtarë mund t’i japë forcë të re ofensivës ruse, ndërsa Ukraina vijon përpjekjet për të arritur paqen.
