Krerët e forcave të armatosura të Francës dhe Britanisë diskutuan për forcimin e ushtrisë ukrainase dhe opsionet e sigurisë që duhet t’i ofrohen vendit menjëherë pas zbatimit të armëpushimit. Kështu deklaroi të shtunën gjenerali francez Thierry Bourcard pas vizitës së tij në Kiev të premten e kaluar së bashku me admiralin britanik Tony Radakin .
Gjatë vizitës së tyre, dy oficerët ushtarakë zhvilluan bisedime me homologun e tyre ukrainas, gjeneralin Oleksandr Sirsky , Ministrin e Mbrojtjes Rustem Umerov dhe Presidentin Volodymyr Zelensky.
Qëllimi i kësaj vizite të përbashkët ishte “shkëmbimi i pikëpamjeve mbi nevojat dhe objektivat e ushtrisë ukrainase për ta mbështetur atë për një afat të gjatë në procesin e rindërtimit dhe zhvillimit të saj, shpjegoi në një deklaratë shtabi i përgjithshëm francez i forcave të armatosura.
Është e rëndësishme të sigurohet “mbështetja e vazhdueshme vendimtare për ushtrinë ukrainase që do t’i lejojë asaj të vazhdojë betejën e saj” kundër Rusisë, komentoi gjenerali Burkar, si dhe të përcaktohet një “strategji e rindërtimit afatgjatë dhe transformimit të modelit të ushtrisë ukrainase, që është garancia kryesore e sigurisë për vendin”.
Parisi dhe Londra po përpiqen të krijojnë një koalicion vendesh të gatshme për të ndikuar në negociatat që Uashingtoni ka nisur me Moskën për t’i dhënë fund luftës dhe për të organizuar operacione sigurie për të parandaluar Rusinë nga rifillimi i armiqësive më vonë.
“Ne po diskutojmë një prani në tokë, në ajër dhe në det. Dhe gjithashtu për mbrojtjen kundërajrore dhe disa çështje të tjera të ndjeshme,” tha Presidenti Zelensky të premten në mbrëmje, i cili e përshkroi bisedën me zyrtarët ushtarakë francezë dhe britanikë si serioze dhe konstruktive.
