Kujtim Gjuzi i ka ndërprerë fjalën Ramës në Kuvend. Kryeministri po fliste për datën e zgjedhjeve dhe po thoshte që data 30 qershor është e panegociueshme. Rama e quajti Gjuzin “Kujtim Gjuzi i Parë”.
“Data 30 qershor buron nga Kushtetuta, si përcaktim i … Për ata që s’kanë zë në sallë, kam fatin të ndërpritem nga lartmadhëria e tij, Kujtim Gjuzi i Parë. Mos më ndërprit të lutem dhe reflekto edukatën monarkike. Kemi bërë progres, nga Flamuri pa shkop, te Gjuzi i Parë. I japim tharm seancës ndërprerjet në parlament ndryshe nga ndërprerjet e shkopit pa flamur”, tha Rama.
Deputeti Kujtim Gjuzi, i ardhur në Parlament nga listat e Partisë Demokratike, ka që prej ditës së parë që ka hyrë në Kuvend, që kërkon praninë e kryeministrit Edi Rama. Gjuzi ka thënë se me të nuk bëhet shaka, por sot që Ramës i ndërpreu fjalën, Gjuzi kërkoi ndjesë. Pritet të shohim si do të vijojë kjo "përballje".
