Gjykata e Krimeve të Rënda ka pushuar çështjen ndaj Admir Murataj, pas dorëzimit nga prokuroria të certifikatës e vdekjes, aktit daktiloskopik dhe këqyrjes së kufomës.
Sipas materialeve të dorëzuara nga akuza, kufoma është identifikuar nga krahasimi i shenjave të gishtave nga ato të ardhura nga Greqia.
Gjatë seancës së sotme, Gjykata caktoi edhe një avokat kryesisht për të përfaqësua interesat e viktimës. Sipas materialeve të dorëzuara nga prokuroria, Admir Murataj ka humbur jetën nga një plagë në kokë në datën 9 prill 2019.
Murataj u vra në ngjarjen e 9 prillit ku u grabitën rreth 6 milionë euro në aeroportin e Rinasit, ndërsa ishte akuzuar nga prokuroria si organizator i 3 grabitjeve të blindave me para në harkun kohor të 2015-2017.
