Nuk kanë fund sherret në emisionet live në Ukrainë, ku si gjithmonë shkak bëhen tema në lidhje me Rusinë dhe ndërhyrjet e saj në Ukrainë.
Së fundmi deputeti ukrainas Igor Mosiyçuk është konfliktuar gjatë një transmetimi live në Tv News One me analistin dhe ekspertin e shkencave politike, Aleksandr Semçenko.
“Sputnik” raporton se Mosiyçuk akuzoi analistin Semçenko se paguhet nga lideri i Çeçenisë, Ramzan Kadirov për të bërë propagandë për Rusinë. Semçenko reagoi duke e quajtur deputetin të sëmurë mendor, çka bëri që ky i fundit ta sulmonte analistin.
Mosiyçuk më pas tregoi nga telefoni disa të dhëna dhe kërkoi që Semçenko të largohet nga studio. Semçemko plotësoi kërkesën, por para se të largohej lëshoi disa akuza ndaj Mosiyçuk, i cili e ndoqi dhe e goditi nga pas.
