Një autobus me udhëtarë është përplasur ballë për ballë me një nga shtyllat e mbikalimit të një daljeje nga autostrada në një rrugë dytësore në Aviles, me drejtim Oviedon, Spanjë. Përplasja ndodhi në orën 13:40 në dalje të Avilesit.
Deri më tani, shërbimi i emergjencave të Asturias informon se të paktën 5 persona kanë humbur jetën në vendngjarje, ndërsa një tjetër gjatë transportit për në spitalin “San Agustin”, ndërsa 16 të tjerë janë plagosur.
Zjarrfikësit kanë mundur të nxjerrin trupat e pajetë të 3 personave nga brendësia e autobusit të shkatërruar në aksident.
Në vendngjarje shkuan shërbimet e emergjencave, garda civile dhe policia, që kanë menaxhuar mes vështirësive edhe trafikun në zonë. Një helikopter i urgjencave ka transportuar gjithashtu disa të plagosur në qendrat shëndetësore më të afërta.
