66 delegatë do t’i drejtohen Asamblesë Zgjedhore të Federatës së Futbollit, mbledhja e së cilës do të zhvillohet nesër (e mërkurë) në Durrës, në një nga hotelet e njohura të plazhit për të votuar për presidentin.
Presidenti aktual Armand Duka kërkon mandatin e 5 dhe sfidohet nga rivali kryesor, deputeti socialist, ish-sekretar organizativ i PS, Bashkim Fino, si dhe ish-arbitri Shpëtim Hala.
Garë e ndezur
Gara për kreun e FSHF është ndezur së tepërmi veçanërisht mes kandidatëve Duka dhe Fino.
Ka patur akuza dhe kundërakuza nga të dy palët. Ndoshta kjo ka sjellë edhe rritjen e masave të sigurisë në ambientet ku do të mbahet asambleja.
Veç shërbimit të një policie private të kërkuar për të siguruar të gjithë eventin është kërkuar edhe ndihma e Policisë së Shtetit, madje ka zëra se për mbarëvajtjen e këtyre zgjedhjeve do të angazhohen edhe Forcat e Ndërhyrjes së Shpejtë.
Delegatët
Nga 66 delegatët me të drejtë vote në asamble 54 i përkasin klubeve të futbollit të Superligës, kategorisë së parë dhe të dytë.
Ndërsa 12 janë shoqatat rajonale të futbollit, minifutbollit, shoqata e arbitrave trajnerëve dhe mjekëve sportivë.
Monitorimi i procesit
I gjithë procesi zgjedhor do të monitorohet nga 2 përfaqësues të UEFA-s dhe një i FIFA-s.
Ditë më parë zv/Presidenti i Organizmit Europian të Futbollit erdhi në Shqipëri dhe pas një takimi me kryeministrin lëshoi mesazhe të qarta kundër përfshirjes së politikës në këtë proces zgjedhor.
