Një krim pasioni tronditi kryeqytetin këtë të diel, ku një 23 vjeçar qëlloi me armë zjarri dhe e la të vdekur vajzën që dashuronte, 21 vjeçë. Ngjarja ndodhi pak para ores 15:00 pranë Fakultetit të Mjekësisë. Djali ka qëlluar edhe veten po me armën e zjarrit dhe ndodhet në reanimacion në gjendje të rëndë.
Sipas policisë, paraprakisht dyshohet se shkak për ngjarjen e rëndë ishte kërkesa për lidhje, e refuzuar nga vajza.
Burimet thanë se Aldison Belulaj, dhe Ariela Murati, ishin nga fshati Zharrëz i Fierit, dhe të dy kishin mbaruar studimet në gjimnazin ‘Sotir Kapo’.
Mësohet se që prej kohës së gjimnazit, djali kishte ndjerë për vajzën të cilën e kishte ndjekur edhe në Tiranë. Në historinë e tyre kishin ndërhyrë edhe familjarët e vajzës të cilët i kishin kërkuar 23 vjeçarit që të mos e ngacmonte më vajzën e tyre, pasi ishte kthyer i bezdisshëm.
Djali madje i kishte vajtur edhe në shtëpi vajzës por familja e saj nuk ka qënë dakord dhe i kanë kërkuar të heqë dorë nga kjo kërkesë. Edhe vajza e ka refuzuar në vijimësi, por i riu nuk ishte bindur për këtë gjë, raporton korrespondentja e Panorama, Majlinda Rama.
Belulaj njihej si djalë i urtë dhe jo problematik, e së fundmi kishte nisur edhe punë si infermier, ndërsa vajza ishte studente ekselente në Fakultetin e Drejtësisë në Tiranë dhe jetonte në shtëpi me qera.
Të dy të rinjtë kanë qenë nxënës shumë të mirë në shkollë.
