Një bandë hajdutësh shqiptarë, ku rolin kryesor e kishte një grua që punonte si parukiere, u arrestua nga policia shtetërore italiane.

Bëhet fjalë për 4 shqiptarë, që vepronin në provincën e Modenas, por edhe në zona të tjera. Nga fundi i vitit 2016 deri në fillim të vitit 2017, ata kishin kryer plot 40 vjedhje në apartamente të ndryshme.

Gruaja që punonte si parukiere në Correggio, në Reggio Emilia, pasi dëgjonte bisedat e klientëve udhëzonte 3 bashkëpunëtorët, ku bënte pjesë edhe ish-bashkëshorti, duke sinjalizuar periudhën kur shtëpitë ishin bosh, për shkak të angazhimeve apo largimit për pushime të pronarëve, raportojnë mediet lokale.

Fokusi kryesor i vjedhjeve ishin stolitë, e për këtë arsye operacioni u pagëzua "Stoli". Falë sendeve të çmuara, që sipas mediave italiane i kishte grabitur me profesionalitet të madh, e më pas i kishte dërguar në Shqipëri, grupi kriminal kishte grumbulluar qindra mijëra euro.