Netët e nxehta të korrikut po shkojnë në pikun e tyre, duke mbipopulluar Durrësin nga mijëra pushues e turistë.
Shëtitorja “Taulantia” është kthyer në vendpushimin e qindra në mos mijëra njerëzve çdo natë. Jo vetëm pikë takimi e argëtimi për të rinjtë e të vegjëlit, por edhe një vend pushimi ku qytetarët ulen e thithin jodin e mbrëmjes.
Qindra persona kryejnë shëtitjen tradicionale, ndërsa për shumë të tjerë kjo shëtitore është një mundësi e mirë fitimi. Tregtarët e vegjël dhe ambulantët deri në orët e vona të natës janë aty duke shitur mallrat e tyre, ndërsa shumë qytetarë shëtisin buzë detit.
Në këtë zonë bregdetare të gjithë gjejnë veten. Piktorët amatorë janë aty për të pikturuar e shitur punët e tyre, aty janë edhe librashitësit.
Është një ritual që shoqëron të gjithë durrsakët e turistët çdo verë, shëtitja e mbrëmjes e qëndrimi para lokaleve luksoze.
Disa shijojnë akulloret, të tjerë kafenë, apo edhe gatimet e shijshme me bazë prodhimet e detit.
Për më shumë ndiqni videon e mëposhtme që na sjell një tablo të jetës në qytetin e Durrësit gjatë pasditeve të vona të korrikut.
K.H.
