Cristiano Ronaldo është kapur nga kamerat teksa ka kaluar me semafor të kuq në një kryqëzim, pikërisht në sytë e policisë spanjolle, që thjeshtë ka parë veprimin kundraligjor të yllit të Real Madrid. Ky i fundit është xhiruar në kamera duke u larguar nga “Bernabeu” pas barazimit 3-3 të “Los Blancos” ndaj Las Palmas.
Ronaldo shënoi dy herë për të shpëtuar ekipin e tij nga një humbje e turpshme dhe për të siguruar një pikë të vlefshme në garën për titullin kampion në La Liga. Aktualisht Real Madrid renditet në vend të dytë, me një pikë distancë nga Barcelona që ka marrë kryesimin.
Kapiteni i përfaqësueses së Portugalisë kthehet djathtas menjëherë pasi del nga parkimi i stadiumit dhe si për çudi të të gjithëve, bën një manovër duke kaluar nga korsia e djathtë, në të majtën, për të vijuar më pas rrugëtimin e tij i qetë dhe normal, ndonëse ishte përballë një semafori të kuq në kryqëzim. Shumë oficerë policie shihen që qëndrojnë në krah të rrugës, por asnjëri prej tyre nuk bën as përpjekjen më të vogël për të ndalur yllin e “galaktikëve”.
