Partia Demokratike ka pranuar më në fund pasditen e së enjtes, pas një dite të gjatë negociatash, draftin e ri të ambasadorëve ndërkombëtarë, propozuar pas dështimit të marrëveshjes së arritur ditën e djeshme.
Por çfarë përmban marrëveshja e re e arritur mes kreut të Partisë Demokratike, Lulzim Basha, në Kryesinë e Kuvendit, së bashku me ambasadorët e SHBA-ve dhe BE-së, Lu dhe Vlahutin?
Burimet e “Panorama.al” bëjnë me dije se Lulzim Basha ka rënë dakord me dy liderët e maxhorancës dhe ambasadorët Lu e Vlahutin për formulën e re të zgjedhjes së Këshillit të Lartë të Gjyqësorit dhe Këshillit të Lartë të Prokurorisë.
Formula për zgjedhjen e anëtarëve të KLGj dhe KLP, parashikon vetingun përmes Operacionit Ndërkombëtar të Monitorimit, të gjithë anëtarëve të KLGj dhe KLP. OMN do të jetë një organ rekomandues dhe jo vendimmarrës.
Gjithashtu formula e re parashikon edhe hedhjen e shortit në rast se gjatë dy raundeve të para të votimit, Parlamenti nuk i zgjedh dot anëtaret e këtyre dy trupave.
Kështu, 5 nga 11 anëtarët e Këshillit të Lartë të Gjyqësorit dhe Këshillit të Lartë të Prokurorisë do të përzgjidhen nga një komision prej 5 anëtarësh në Parlament, 3 nga mazhoranca dhe dy nga opozita. Kandidati duhet të marrë 4 vota. Në qoftë se krijohet ngërç, atëherë përzgjedhja bëhet me short.
