Duke marrë parasysh interesin kombëtar, edhe Komuniteti Mysliman i Shqipërisë i ka bërë apel për konsensus klasës politike për miratimin e reformës në drejtësi.
Në një deklaratë për mediat, KMSH thekson se është duke ndjekur me vëmendje zhvillimet e fundit të punimeve për reformën në drejtësi.
“Duke parë rëndësinë e kësaj reforme, KMSH shpreson që Kuvendi i Shqipërisë do të reagojë maturisht dhe do bëjë zgjedhjen më të mirë të mundshme, e cila do të shërbejë në të mirë të qytetarëve dhe politikave të Republikës së Shqipërisë. I bëjmë thirrje të gjithë klasës politike dhe grupeve të interesit të gjejnë rrugën e përbashkët dhe të bien në konsensus për reformën në drejtësi, duke marrë parasysh interesin kombëtar dhe mbarëshoqëror”, thuhet në deklaratë.
KMSH thekson më tej se është përkrah çdo nisme e cila i shërben shoqërisë shqiptare dhe që sjell zhvillim dhe prosperitet në vendin tonë.
