Ish-trajneri i kombëtares italiane Marcello Lippi mund të ulet në stolin e kombëtares belge, për momentin ende pa trajner pas shkarkimit të Marc Wilmots. Lajmin e ka konfirmuar sot e përditshmja belge “Derniere Heure”, që i referohet burimeve nga Federata Belge e Futbollit. Sipas informacioneve të grumbulluara dhe publikuara sot në gazetë, Lippi është kandidati kryesor për të drejtuar kombëtaren belge në aventurën që nis në shtator drejt Botërorit të Rusisë. Lippi ka profilin e duhur për të drejtuar një kombëtare me shumë yje siç është ajo e Belgjikës, që në Euro 2016 zhgënjeu, duke mos arritur objektivat që i kishte vënë vetes. Sipas Federatës Belge të Futbollit ish-trajneri i kombëtares “azzurre” ka përvojën e duhur për të drejtuar kombëtaren, ashtu si dhe kanë kërkuar vetë lojtarët, që janë shrpehur se dëshirojnë një trajner me përvojë. Lippi, 68 vjeç, për momentin nuk drejton ekip dhe mësohet se ka shprehur gadishmërinë e tij për të drejtuar kombëtaren belge.