Reali i Madridit humbet vendin e parë në klasifikimin e përgjithshëm të klubeve më të pasura të hartuar nga revista Forbes. Janë teksanët e Dallas Cowboys ata që marrin kryesimin në listën me 50 ekipet me vlerën më të madhe ekonomike në planet. Shoqëria e futbollit amerikan, që është edhe skuadra me më shumë tifozë në Shtetet e Bashkuara të Amerikës, vlen rreth 4 miliardë dollarë, duke lënë pas gjithë klubet e sportit botëror. Në këtë mënyrë, që prej vitit 2011 kur ka nisur të publikohet edhe ky klasifikim, nuk ndodhet në krye një klub futbolli. Reali i Madridit që kryesonte bindshëm në tre vitet e fundit, ka zbritur në pozicionin e pestë, duke u paraprirë nga Barcelona dhe Manchester United. Në fakt, katalanasit kanë bërë një hap të madh duke e rritur ndjeshëm vlerën e klubit në 3.65 miliardë, ndërsa “Djajtë e Kuq” vlerësohen me 3.55 miliardë, rreth 200 milionë dollarë më shumë se “Los Blancos”, pavarësisht se këta të fundit arritën të shpalleshin kampionë Europe gjatë sezonit të fundit. Vendin e katërt me 3.4 miliardë e mbajnë New York Yankees që mbeten lider në lojën e bejsbollit, ndërsa në dhjetëshen e parë, NBA përfaqësohet nga New York Knicks që pozicionohen të shtatët me 3 vlerë 3 miliardë Dollarë. Nga futbolli amerikan, përfaqësues në dhjetëshen e parë janë edhe Washington Redskins e New York Giants, çka do të thotë se sporti më preferuar përtej Atlantikut vazhdon të jetë një nga më fitimprurësit në planet duke u rritur çdo vit e më shumë.