Një sherr për shkak të ngacmimit të kamarieres i ka marrë jetën një shqiptari në Athinë. Ngjarja ka ndodhur të mërkurën në mbrëmje në qendër të qytetit, afër Omonias.
Viktima është Vangjel Kremidha, i cili është pronar i një kafeneje në kryeqytetin grek. Ngjarja vdekjeprurëse erdhi pasi kamarierja e kafenesë u ankua te shqiptari se një klient e ngacmonte.
47-vjeçari bashkë me të dashurin e vajzës nga Kazakistani, kanë ndërhyrë duke larguar një emigrant nga Iraku që ishte kthyer në shqetësim për kamarieren. 
Nuk vonoi shumë dhe palët filluan të konfliktohen, derisa irakeni nxorri pistoletën dhe qëlloi mbi shtetasin Vangjel Kremidha, nga fshati Kalcat i Sarandës dhe mikun e tij.
Kremidha humbi menjëherë jetën, ndërsa miku i tij mbeti i plagosur në këmbë dhe aktualisht ndodhet i shtruar në spital. Në spital u dërgua edhe një kalimtar i rastit për shkak se u plagos nga një plumb që bëri rikoshet.
Trupi i viktimës u dërgua në morg, ndërsa policia thotë se pas kontrollit të kamerave të lokalit ka identifikuar autorin e krimit..
