DURRËS, 12 gusht 2014 – Në portin e Durrësit po ngarkon për eksport 23 mijë tonë klinker një anije gjigante e Singaporit.
Sipas raportit ditor të dispeçerisë së Autoritetit Portual Durrës (APD), në Terminalin Lindor, në kalatën nr. 11, me thellësi 7.3/9.9 metra, po përpunohet anija IVS KANDA, transportues gjigant për mallra të paambalazhuara të ngurta (italisht: rinfuse, anglisht: dry cargo / bulk).
IVSKANDA po ngarkon 23 000 tonë klinker (lëndë e parë për prodhim çimentoje) për eksport, operator EMS APO, agjenci detare Alba Transport shpk, me seli në Vorë.
Anija ka mbërritur në radën e portit të Durrësit më 11 gusht 2014, ora 16:15, i nisur në mesnatën e 8 gushtit 2014 nga porti spanjoll i Valencia-s.
Info
IVS KANDA ka gjatësi prej 177 m dhe gjerësi 28.41 m; kapacitet bartës dhe peshë vetjake gjithsej prej 32 621 tonë; thellësi 6.4 m; shpejtësi 14.3 / 12.4 nyja.
U ndërtua në vitin 2004 në kantierin Kanda Shipbuilding – Kure dhe u klasifikua nga regjistri japonez Nippon Kaiji Kyokai.
Mban flamurin e Singaporit, ku është selia e pronarit dhe menaxherit Grindrod Shipmanagement – Singapore.
/th. m. agjencia e lajmeve “Dyrrah”/
