Tiranë, 23 qershor 2014 – Kryetari i Partisë Demokratike, njëkohësisht edhe kryetar i Bashkisë së Tiranës Lulzim Basha e konsideron skemën e Qeverisë për ndarjen e re territorial-administrative jo funksionale për qytetarët. Basha theksoi se kjo skemë i shërben për ti hedhur graso dinosarurëve të rinj të skemave të vjetra të komitetit ekzekutiv.
“Mazhoranca do të realiziojë ndarjen territoriale, Enver Hoxha plus. Kjo skemë nuk do të funksionojë për qytetarët, nuk është e qëndrueshme dhe nuk kursen para, por do të hajë më shumë para, por jo për t’i kthyer në investime por për t’i hedhur graso dinosaurëve të rinj të skemave të vjetra të komiteteve ekzekutive. Ndaj le ta ndalim sa nuk është vonë, le ta ndalim me forcën e arsyes. Ta konsiderojmë këtë seminar dhe dy konferenca si thirrje të arsyes për këdo që është me të vërtetë i interesuar për këtë proces. Nëse thirrja e arsyes nuk funksionon ne të zgjedhurit vendorë nuk do të rrimë duarkryq e të heshtur. i bëjmë thirrje qeverisë t’i përgjigjet thirrjes së arsyes të ulet të dialogojë me ne përfaqësuesit e pushteteve vendore, në të kundërt me Kushtetutë në dorë do ti presim në sheshet dhe rrugët e vendit. Jo për të mbrojtur ngjyrat e PD, por për të mbrojtur ngjyrat e patjetërsueshme të lirisë që kanë qenë dhe mbeten burim i mirëqënies dhe vlera më e çmuar e shqiptarëve tash 23 vite”, tha Basha.
Në vijim ai shtoi se “në 23 vite demokraci është punuar që të mos qëndrojmë tek status quo e regjimit të kaluar po tek ndryshimi, të lëvizimi nga Sekreratët e parë të partisë, e të kalojmë tek përfaqësuesit e zgjedhur nga qytetarët”.
“Pushteti vendor sot administron rreth 2.1 përqind të PBB, ndërsa pushteti qendror 33 përqind të PBB. Me pak fonde pushteti vendor po bën shumë punë. Nuk ka qytetar që ta gjejë veten tek ndarja e re e Shqipërisë në modelin e Enver Hoxhës”, theksoi Basha, duke shtuar se mazhoranca nuk ka ofruar asnjëherë dialog për opozitën.
“Tavolina imagjinare e dialogut nuk ekziston, pasi Qeveria Rama-Meta e ka zgjedhur ku do të dali, do të ndërtojë qarqe si Enver Hoxha por duke respektuar minoritetet. Dyshja Rama-Meta është me vizion të vjetër oligarkësh, por ky nuk do funksionojë. Kemi kërkuar dhe vazhdojmë ta kërkojmë tryezën e dialogut. Për ta bërë këtë duhet të nisemi jo vetëm nga një vullnet i mirë por edhe nga një bashkim i fakteve e argumentave dhe ku duam të dalim. Por faktet e argumentat flasin se nuk duhet një ndarje të madhe. Ta lëmë konfliktim politik, jemi gati t’i përvishemi punës ashtu siç duhet me debate, shkembime faktesh, debate. Një gje është e sigurt, kjo ndarje nuk do të funksionojë për qytetarët”, u shpreh Basha, ndërsa theksoi se opozita nëse nuk ofrohet dialog nuk do të rrijë duarkryq.
Komentet dhe paralajmërimet e kreut demokrat u bënë gjatë konferencës: “Zgjerimi i autonomisë vendore, reformë e qëndrueshme territorial”, ku morën pjesë kryetarë komunash e bashkish, ekspertë dhe grupe interesi. Përfaqësuesit e bashkive dhe komunave kërkojnë konsulencë të gjerë për reformën territoriale, që zëri i tyre të dëgjohet dhe theksojnë se rritja e autonomisë dhe decentralizimi janë më të rëndësishme se sa kufijtë dhe hartat. Në etapën e pare të konferencës u theksua se autonomia vendore funksionin dhe është në shërbim të qytetarëve.
“Deri në vitin 2001 qeverisja vendore kishte një rol shumë të kufizuar. Në vitet 2002-2005 kemi një rritje të moderuar të fuqisë financiare të qeverisjes vendore kombinuar me një shkalle maksimale të autonomise fiskale dhe financiare. Në vitet 2006-2009, kemi një shumefishim të fuqisë financiare të qeverisjes vendore, ndërsa ne vitet 2010-2013 kemi një rritje tjetër të moderuar te fuqise financiare”, u shpreh Drejtori i shoqatës së bashkive, Fatos Hodaj.
Duke analizuar procesin e decentralizimit, forcimit të kapaciteteve dhe rritjes së shërbimeve që ofrojnë njësitë e zgjedhura vendore, u konkludua se komunat dhe bashkitë kanë nevojë për të tepër autonomi dhe pushtet për të rritur rolin e tyre si pushteti më i afërt me qytetarin.
“Në se pranojmë që kemi një model që ka nevoje për permiresime atëherë duhet të japim një zgjidhje alternative. Nëse duam zgjidhje të re të pranueshme dhe të qëndrueshme atëherë ka nevojë të padiskutueshme për gjithpërfshirje dhe konsensus vertikal dhe horizontal. Zgjidhja e re duhet të kapitalizojë të gjithë eksperiencën dhe avantazhet e sistemit të derisotëm”, tha Agron Haxhimali, drejtor i Shoqatës së Komunave..
Më e rëndësishme se sa vizatimi i kufinjve dhe i hartës elektorale është përmirësimi i kapacitetit dhe i autonomisë së pushtetit vendor.
“Procesi duhet të rinisë me metoden e duhur pra, strategji decentralizuese që con në ndarje të re territoriale dhe jo e kundërta. i kemi të gjitha kapacitetet për të ecur shpejt. Asnjë studim, analizë, draft-produkt i bërë deri më sot nuk ka pse të shkoje dem. Gjithcka duhet ripare në funksion të vizionit strategjik. Nuk kemi asnjë situate emergjente për të nxituar “si te marre”, u shpreh, nënkryetarja e Bashkisë së Tiranës, Nevila Xhindi.
Konferenca e mbledhur sot, do të ketë edhe dy etapa të tjera. Në etapën e dytë do të diskutohet mbi reformën administrative dhe konsolidimin territorial. Dhe në etapën e fundit, do të ketë një prezantim të konkluzioneve pas këtij diskutimi dhe konslultimi publik të të zgjedhurve vendorë me ekspertët dhe grupet e interesit.
/agjencia e lajmeve "Dyrrah"/
