Shkodër, 20 qershor 2014 – Policia e Shkodrës ka parandaluar një krim të ri në familje, duke arrestuar 40-vjeçarin Sokol Hoxha, që me një granatë në dorë, ka kërcënuar të vrasë familjen e tij.
Sokol Hoxha, banor në lagjen “10 Korriku”, u arrestua në flagrancë, pasi për motive banale, ai është grindur me familjen e tij dhe ka kërcënuar ta vrasë me një granatë, së cilës edhe ia kishte hequr siguresën.
Në këto kushte, familjarët e kërcënuar kanë kërkuar ndihmën e Policisë, e cila ka mbërritur me shpejtësi dhe e ka neutralizuar Hoxhën, duke ia marrë edhe granatën e pashpërthyer për ta hedhur në lumin Buna, për ta asgjesuar.
Me arrestimin e tij u zbulua edhe armatimi shtesë që Hoxha mbante në shtëpi: një automatik, 75 copë fishekë dhe dy granata të tjera dore.
/agjencia e lajmeve “Dyrrah”/
