DURRËS, 17 qershor 2014 – Shirat “vjeshtorë” të qershorit të dy ditëve të fundit kanë paralizuar punën në portin e Durrësit ku presin të përpunohen 10 anije me 32 667 tonë mallra import-eksporti.
Sipas raportit ditor të anijeve të transportit, hartuar nga dispeçeria e drejtorisë së përgjithshme ekzekutive të shoqërisë publike / shtetërore Autoriteti Portual Durrës (APD) sha, në kalata presin të shkarkohen 7 anije, ndërsa në radë janë edhe 3 anije të tjera, dy për t’u ngarkuar dhe një për t’u shkarkuar.
Kështu anija Leftallah III pret në kalatën 2 të shkarkojë 5021 tonë çimento të paketuar, kurse te njëshi është Frosina me 4 000 tonë çimento të papaketuar, gjithsej 9 021 tonë çimento importi.
Këto dy anije po lënë të presin në radë dy anije, Loyga dhe Lady Eman, që do të ngarkojnë secila nga 5 800 tonë, gjithsej 11 600 tonë çimento për eksport.
Në kalatën 4 anija Modulus 1 ka për shkarkim 2 555 tonë melaninë; në kalatën 5 janë Erdogan Senkaya me 2 300 tonë nitrat dhe Frojdi II me 1 450 tonë lidhje hekuri; në kalatën 7 Caner Karaloglu me 1 091 tonë vaj ushqimor; në terminalin lindor, kalata 10, është Stardale me 1 700 tonë qymur; në radë Ibla me 2 950 tonë skrap për “Kurum”-in e Elbasanit.
Rrugës për në Durrës janë dhe transportuesit Pine 6 për të ngarkuar 15 000 tonë krom; MSC Jilhan për të shkarkuar 110 copë kontejnerë; Perelik me 11 000 tonë qymyr dhe Volga me 1 600 tonë llamarinë.
/th. m. agjencia e lajmeve “Dyrrah”/
