Kosovë, 12 maj 2014 – Pasagjerët e një avioni që po udhëtonte nga Zvicra për në kryeqytetin kosovar Prishtinë, janë terrorizuar nga një 35-vjeçar, i cili kërcënoi se do të hidhte në erë avionin.
Mësohet se 35-vjeçari mbante në dorë një shkrepëse e një shishe me lëng, dhe kërcënonte se do të shpërthente avionin.
Sipas dëshmitarëve, duke thirrur “Allahu Ekber”, 35-vjeçari u ka thënë pasagjerëve se do të shkonin me të në xhenet.
“Do të shkojmë të gjithë te Allahu. A doni që të shkojmë në xhenet a xhehenem? Allahu është i pari, Muhamedi është pas tij, ne të tjerët nuk jemi askushi”,- citohet të ketë thënë ai.
Sipas medieve në Kosovë, njëri prej pasagjerëve, Nehat Llovca, profesionist në arte marciale, ka neutralizuar 35-vjeçarin, duke bërë që avioni të vijonte udhëtimin normalisht.
/agjencia e lajmeve "Dyrrah"/
