DURRËS, 14 shkurt 2014 – Rrjeti sizmologjik shqiptar ka regjistruar lëkundje të lehta toke në mesditën e Shën Valentinit, më 14 shkurt 2014 në rrethinat e qytetit bregdetar. Tërmeti ka ndodhur ora: 11:05:36 (GMT) ose ora 12:05:36 (koha e Shqipërisë +1 GMT), me forcë M=2.2, me epiqendër në thellësinë 28 km. Departamenti i sizmologjisë i Institutit të Gjeoshkencave, Energjisë, Ujit dhe Mjedisit të universitetit publik Politeknik të Tiranës e lokalizon dukurinë tektonike në një largësi në vijë ajrore 8 km në juglindje të qytetit të Durrësit, 25 km në jugperëndim të qytetit të Tiranës, në koordinatat 41.29°V, 19.56°L (shih etiketën në hartën nr. 1, pika e kuqe). “Dyrrahu” saktëson se ngjarja sizmike ka ndodhur në një zonë të banuar kodrinore e në territorin e komunës së Xhafzotajt, në Muharremaj pranë fshatit Manskuri (shih foton satelitore, shigjeta e gjelbër dhe hartën nr. 2, pika e kuqe) midis Rromanatit, Bozaxhijës (komuna Xhafzotaj), Pjezës (komuna Xhafzotaj) dhe (H)Ardhishtes (komuna Gjepalaj). Nuk ka njoftime zyrtare për viktima dhe dëme materiale.
Info
Komuna Rrashbull ka në përbërje fshatrat Rrashbull, Arapaj, Shinovlash, Shkallnur, Manskuri, Rromanat, Bozaxhijë, Xhafzotaj.
Komuna Gjepalaj ka në përbërje fshatrat (H)Ardhishte, Çizmeli, Eminas i Vogël, Gjepalaj, Likesht, Kënetë, Shtrazë, Shahinë, Shetel.
Komuna Xhafzotaj ka në përbërje fshatrat Pjezë, Rreth, Xhafzotaj, Sallmonë, Koxhas, Borakë, Guzaj.
/agjencia e lajmeve “Dyrrah”/
