MEMALIAJ, 30 janar 2014 – Tre polumbarë kanë nisur mëngjesin e sotëm kërkimet në ujërat e lumit Vjosë për armët e përdorura nga katër grabitësit që sulmuan autobusin e linjës Athinë-Tiranë. Katër të rinjtë autorë të ngjarjes ku mbeti i vdekur një 25-vjeçar deklaruan një ditë më parë se armët i hodhën në lumin Vjosë . Policia e Gjirokastrës arrestoi dje 4 autorët që qëlluan me armë ndaj autobusit të linjës Tiranë-Athinë, 2 ditë më parë në Memaliaj.    Sipas policisë, ndalimi i 4 të rinjve u bë pasi nga hetimi i deritanishëm ka rezultuar se 3 të rinjtë Klejdi Tringa, Besmir Ruçi dhe Jurgen Lola, të ndihmuar nga  Gentian Beqiraj, në bashkëpunim me njëri tjetrin në datë 27.01.2014, në orën 01:00, pas një plani të diskutuar dhe menduar një natë më parë në një lokal, në fshatin VASIAR, për grabitje në rrugë, nën efektin e përdorimit te lëndëve narkotike kanë tentuar të ndalojnë duke qëlluar me armë zjarri e më pas të kryenin vjedhjen e  pasagjerëve  të autobuzit, të linjës Athinë-Tiranë, me targa AA 578 GC, në vendin e quajtur Mogila në aksin rrugor Tepelenë-Krahës.   Mësohet se pas krimit autorët janë larguar duke hedhur në lumin ‘Vjosa” armën e krimit. Në cilësinë e provës materiale u sekuestruan 11(njëmbëdhjetë) aparate telefonash celularë, 5.6 gram lëndë narkotike kanabis sativa, 2 automjete, të përdorur nga të rinjtë gjatë kryerjes së krimit.