TIRANE, 20 janar 2014  – Deputetja e Partisë Socialiste në qarkun e Lezhës, Merjeme Delishi, ka dhënë dorëheqjen nga mandati i saj, për arsye shëndetësore. Delishi ka marrë mandatin e deputetes pas dorëheqjes së ministres së Mbrojtjes Mimi Kodheli, më datë 26 dhjetor të vitit 2013. 
Zonja Delishi deklaroi se dorëheqja e saj vjen vetëm për arsye shëndetësore dhe se  nuk mund ta përballojë dot ndjekjen rregullisht të seancave plenare dhe punën e përditshme në komisione parlamentare, pasi është e detyruar dy herë në javë të kurohet dhe të bëjë dializë. 
Komisioni Qendror i Zgjedhjeve e ka zëvendësuar sot mandatin e Delishit, pas kërkesës së Kuvendit për të plotësuar vakancën e krijuar në Grupin e PS-së në qarkun e Lezhës. 
Sipas Kodit Zgjedhor, Delishi është zëvendësuar nga një deputete tjetër femër, Mirela Neli (Syku), që është kandidatja e fundit në listën e PS-së në këtë qark.