14 janar 2014 – Gjatë një aktiviteti lidhur me zhvillimin e qëndrueshëm të industrisë, Ministri i Mjedisit, Lefter Koka, tha se këto të fundit duhet të respektojnë disa norma mjedisore. Ai u shpreh se duhet të vendosin impiante për pastrimin e ajrit dhe ujit të ndotur, falë aktiviteteve të tyre. “Ne kemi të dhëna se shumë subjekte nuk kanë nisur pyllëzimet, ndërsa janë të detyruara me ligj ta bëjnë një gjë të tillë. Për këtë qëllim, ne do të nisim takime. Të gjithë bashkë ne duhet të ndikojmë në rehabilitimin e situatës së mjedisit në vendin tonë”, deklaroi Koka, gjatë aktivitetit të organizuar nga Ministria e Mjedisit dhe Dhomat e Tregtisë. Nga ana e tij, ambasadori i Bashkimit Evropian në vendin tonë, Ettore Sequi, nënvizoi se nga BE janë akorduar fonde për mbrojtjen e mjedisit dhe për ekonominë e vendit. Duke qëndruar në të njëjtën linjë, sipas tij, sa i takon mjedisit, ka rëndësi të madhe mënyra se si performon industria, ndaj shtoi se kjo e fundit duhet të tregohet e kujdesshme.