Durrës. Ja 15 rivalët për drejtor Arsimi

DURRËS, 6 nëntor 2013 – Drejt fashitjes zhurma për drejtorin e ri të Arsimit në Durrës. Për shumë-shumë, 10 ditë, do të mësohet emri kreut të DAR-it.  Sikurse është bërë e ditur, Ministria e Arsimit dhe Sportit njoftoi mbylljen e fazës së parë të konkurrimit për drejtor të drejtorive arsimore rajonale (DAR) në të gjitha qarqet e vendit. Në qarkun e Durrësit plotësojnë kushtet për të hyrë në testim për drejtor 15 kandidatë, nga të cilët 8 janë femra, mbi gjysma (53.3 për qind): Burbuqe Meta, Blerina Dervishi, Esmeralda Xheraj, Elvira Dema, Lindita Kiri, Lindita Mukaj, Rajmonda Aliu dhe Teuta Canaj. Rivaliteti është i madh. Gjasat janë që të fitojë drejtori aktual i arsimit dhe kulturës në bashkinë e Durrësit Ardian Gurra, kjo dhe për shkak të përvojës drejtuese. Qeveria e mëparshme nuk ka zhvilluar konkurs, por ka bërë emërime në bazë të urdhrit partiak nga selia vendore. Testimi me shkrim do të zhvillohet në datën 11.11.2013, ditën e hënë, në orën 10.00 në fakultetin ekonomik, Tiranë. Testimi me gojë do të zhvillohet në datën 12.11.2013, ditën e martë, nga ora 10.00-16.30, në Ministrinë e Arsimit dhe Sportit. Ankesat për rezultatet e më poshtme të bëhen brenda dy ditëve pranë Ministrisë së Arsimit dhe Sportit. “Dyrrah”-u po boton listën e kandidatëve për drejtor në Drejtorinë Rajonale Durrës.

 /agjencia e lajmeve “Dyrrah”/