DURRES, 26 prill 2013 – Skulptorit të njohur durrsak Idriz Balani i akordohet titulli “Mirënjohja e Qytetit”. Pasditen e sotme, në ambientet e odeonit “Nikolin Xhoja” u zhvillua një ceremoni e posaçme gjatë të cilës kreu i bashkisë së Durrësit, Vangjush Dako, i akordoi skulptorit të njohur titullin.
Në karrierën e tij 35 vjeçare në fushën e skulpturës, Idriz Balani ka krijuar vepra monumentale veçanërisht të figurave të shquara historike të vendit dhe punimet e tij janë të ekspozuara në Durrës, por edhe në shumë qytete të tjera të Shqipërisë dhe Kosovës.
Në fjalën e tij kryebashkiaku i Durrësit, Vangjush Dako, e ka vlerësuar lart punën e madhe që ka bërë skulptori Balani jo vetëm përsa i përket vlerave artistike por edhe përjetësimit të figurave të shquara historike të kombit shqiptar. Më pas kryebashkiaku Dako i ka dhënë skulptorit të njohut Titullin “Mirënjohje e Qytetit” me motivacionin “Për kontributin e dhënë në skulpturën shqiptare, veçanërisht në përjetësimin e figurave tona historike”.
Idriz Balani e ka filluar karrierën e tij artistike që në vitin 1979 kur është diplomuar në Akademinë e Arteve në Tiranë. Ai ka bashkëpunuar me skulptorët më të mëdhenj shqiptarë si skulptori i popullit Mumtaz Dhrami etj dhe në karrierën e gjatë artistike ka realizuar kryesisht monumente dhe buste. Në Durrës janë të vendosura në të gjithë qytetin skulpturat e Balanit ku disa prej tyre janë bustet e figurave të shquara si Naim Frashëri, Kozma Nushi, Sabri Tuci, Telat Noga etj.
Ndërkaq skulptori i njohur ka realizuar shumë buste e monumente edhe në Kosovë ku mund të përmenden monumenti i patriotit Haxhi Zeka në bashkëpunim me skulptorin Qazim Kërtusha vendosur në qytetin e Pejës apo edhe shumë buste të tjera të figurave të shquara si Gjergj Kastrioti Skënderbeu, Ibrahim Rugova etj të vendosura në disa qytete të Kosovës.
Ndërkohë një nga punët e tij më të njohura është busti i Isa Boletinit, një monument historik me lartësi 3.60 metra i vendosur në Mitrovicë dhe në Isniq. Skulptori Idriz Balani vazhdon të punojë me disa monumente të tjerë që përjetësojnë figura të shquara të kombit tonë dhe që do të vazhdojnë të vendosen në Shqipëri dhe në Kosovë.
/e.a. Agjencia e lajmeve "Dyrrah"/
