TIRANË, 25 prill 2013- Kuvendi nisi punimet e seancës së sotme plenare me debate teksa po diskutohej e projektligjit "Për dhënien me koncesion të shërbimit të skanimit të mjeteve në doganat shqiptare". 

Pr/ligji parashikon si fituese të koncesionit kompaninë amerikanen 'Rapiscan", e njohur në këtë fushë, ndërsa procedura konkuruese është kryer duke zbatuar të gjitha procedurat dhe etapat e përcaktuara në ligjin "Për koncesionet". 

DEBATET BODE-BRACE PER KONCENSIONET

Diskutimi për këtë pr/ligj ngjalli reagimin e deputetëve të Partisë Socialiste të cilët folën për një tjetër monopol, që sipas tyre qeveria e lë në dorë të kompanisë private, e cila, sic tha deputeti Brace do rrjepë popullin. “Po rripni qytetarët e republikës gjatë këtyre viteve dhe me vendimin e sotëm edhe për 15 vitet që do vijnë. Kjo praktikë duhet të marrë fund, atdhe të 5 biznesmenëve privatë nuk mund të ketë, duhet të jetë publik, nëse nuk e bëni ju do e bëjmë ne”- tha deputeti Erjon Brace.

Sipas tij, në 15 vite shqiptarët do paguajnë rreth 1 milionë euro koncesionarit privat që do skanojë mjetet në doganat shqiptare.

Në kundërpërgjigje, ministri i Financave Ridvan Bode tha se edhe Rama ka deklaruar se do të jepte me koncesion menaxhimin e doganave të Shqipërisë. Ky koncesion sipas tij, mundëson një shërbim më cilësor me pagesë më të pakët. 

“Koncesionimi është zgjidhja më efikase. Rilindësi juaj Rama deklaroi publikisht se do jepte me koncesion menaxhimin e doganave të Shqipërisë. Kjo është pjesa më thelbësore e menazhimit të doganave, kontrolli fizik i mallave dhe atëhere nuk do të ketë nevojë për grupe taksidarësh që deklarojnë ose jo të vërtetën, por do të ketë një kompani që do të kontrollojë mallrat që dalin nga Shqipëria”, tha Bode 

Sipas tij, "Kjo është transparencë, kjo është luftë kundër evazionit, kjo do të thotë t'i kthehen atdheut pasurirë që i takojnë dhe të mos i lësh ato në duart e kontrabandistëve dhe evazorëve. Po ja japim kompanisë më të madhe të imaxherisë botërore kontrollin e doganave shqiptare që të bëjmë transparencë për të gjithë qytetarët. Me këtë strategji do të vazhdojmë edhe më tej. Deri më sot kam bërë pesë koncesione, sikur të mundesha do të bëja edhe 15 të tjera", deklaroi Bode.

MALAJ: QEVERIA E KAPUR, DËSHTIM ME CDO KONCESION

Ndërsa deputeti i PS-së, Arben Malaj akuzoi qeverinë se ka dështuar me të gjitha koncesionet e dhëna në 8 vite, duke treguar sic tha ai, kapjen e shtetit. 

“Kjo që ndodh me qeverinë në ikje është model vetëm i Shqipërisë. Po tregohet kapja përfundimtare e shtetit dhe kjo ndodh me koncesionimin e pasurive natyrore. Koncesionet tuaja janë të gjitha të dështuara dhe kjo rëndon mbi shqiptarët”, tha Malaj. 

Të gjitha koncesionet e e qeverisë sic shtoi Malaj, nuk plotësojnë dy kushtet më thelbësore kredibilitetin teknologjik dhe financiar. 

“Ju nuk i keni dhënë koncesione kompanive serioze. Kapja e shtetit dhe korrupsioni janë në nivelet më të mëdha. Skandal me kasat fiskale, po me kontenierët cfarë do ndodhë? Marrëveshjet e koncesionit realizohet nga ju që të keni të ardhura edhe kur nuk do të jeni në pushtet, nëpërmjet nënkoncesionarëve. Nuk mund të ketë sukses nëse miratojmë ligje që nuk implementohen. Ju po mendoni për paratë tuaja pas zgjedhjeve”, shtoi Malaj. 

BRACE: TË MOS TAKSOHET DHURIMI I TOKËS, BODE: TAKSA MBI KORRUPSIONIN

Debate në sallë ka ngjallur edhe diskutimi për pr/ligjin e tatimit mbi të ardhurat. Deputeti i PS-së Erjon Brace ka kërkuar të mos taksohet dhurimi i tokës, ndërsa për ministrin Bode të mos e taksosh do të thotë të pastrosh paratë. 

“Po nguteni për nevoja elektorale, nuk po zgjidhni problemin e pronësisë mbi tokën. Të mos taksohet dhurimi i tokës”, tha Brace. 

Ndërsa Bode u shpreh se, “Kjo është taksë mbi korrupsionin, duhet taksuar. Edhe dhurimi duhet taksuar, pasi dhurimi pa taksa është pastrim parash”, tha ai. 

Ministri Bode ngriti më tej akuza për një kandidat të PS. Duke iu drejtuar Bodes ai shtoi se, “Ti shiko dosjen e kolegëve që e ke vënë në krye të listës, janë pasuruar me transaksione tokash”. 

DEKRETET E PRESIDENTIT NE REND TE DITES

Krahas shqyrtimit të një numër pr/ligjesh ekonomike dhe në fushën e drejtësisë, pikë e rëndësishme e rendit të ditës së Kuvendit është dhe votimi i dekreteve të Presidentit të Republikës, për emërimet në Gjykatën Kushtetuese dhe Gjykatën e Lartë.