Vitin e kaluar, qeveria mblodhi 19,7 miliardë lekë të ardhura më pak se plani i buxhetit. Të dhënat zyrtare nga Ministria e Financave tregojnë se mosrealizimet më të mëdha erdhën nga tre zëra: akciza, tatimi mbi të ardhurat personale dhe të ardhurat jotatimore.
Kur të ardhurat rezultojnë më të ulëta se plani, qeveria ka dy rrugë për ta kompesuar rënien: të rrisë borxhin publik ose të ulë shpenzimet. Të dhënat tregojnë se për vitin 2015 ajo ka zgjedhur këtë të dytën, madje duke i ulur shpenzimet edhe më shumë se sa mosrealizimi i të ardhurave.
Sipas Ministrisë së Financave, për vitin 2015 shpenzimet faktike të buxhetit rezultuan 25,8 miliardë lekë më të ulëta se sa plani buxhetor. Por, cilat ishin zërat që kompesuan mosrealizimin e të ardhurave. Shifrat zyrtare të Ministrisë së Financave tregojnë se janë tre kategori shpenzimesh që kanë mbajtur peshën më të madhe. Këto janë shpenzimet për fondet speciale, ku futen pensionet dhe pagesat për sigurimet shëndësore, shpenzimet për buxhetin vendor dhe zëri i tretë është ai i ndihmës ekonomike.
