Zbulohet identiteti i 43-vjeçarit nga Durrësi i cili ka përfunduar në prangat e policisë pasi ishte në kërkim ndërkombëtar.
Bëhet me fjalë për shtetasin Gazmend (Dervishi) Gjyzeli, 43 vjeç, banues në Durrës, i dënuar me burg në shtetin italian për veprat penale “shfrytëzim prostitucioni” dhe “përdhunim”.
Sipas burimeve zyrtare, 43-vjeçari është dënuar me 5 vite burg me vendim të datës 13.09.2003 të Gjykatës së Padovas.
NJOFTIMI I POLICISË
Vijojnë operacionet e njëpasnjëshme për kapjen e personave të shpallur në kërkim ndërkombëtar.
Operacioni nga Seksioni për Hetimin e Narkotikëve në DVP Durrës, në bashkëpunim me Interpol Tirana.
Vihet në pranga 1 shtetas i shpallur në kërkim ndërkombëtar nga Italia, me qëllim ekstradimi drejt këtij shteti.
Në vijim të punës për kapjen e personave të shpallur në kërkim ndërkombëtar, specialistët për Hetimin e Narkotikëve, si rezultat i shkëmbimit të vazhdueshëm të informacioneve me ZQK Interpol Tirana, kanë bërë të mundur lokalizimin dhe arrestimin provizor të shtetasit G.(D).Gj., 43 vjeç, banues në Durrës.
Këtë shtetas Gjykata e Padova, Itali, me vendimin e datës 13.09.2003, e ka dënuar me 5 vjet burg për veprën penale “Shfrytëzim i prostitucionit” dhe “Përdhunimi”, të parashikuar sipas Kodit Penal Italian.
Interpol Tirana, në bashkëpunim me Interpol Romën, vijojnë procedurat për ekstradimin e këtij shtetasi drejtë Italisë.
