2 gusht 2015 – Populli shqiptar ka shumë tradita dhe zakone që i dallojnë nga të tjerët. Njëra prej tyre, e cila u bën përshtypje shumë të huajve, por edhe vetë shqiptarëve, është në qendër të një reportazhi të përgatitur nga BBC-ja dhe të shumëlexuar në portalin e tyre.
Gazetarja Elizabeth Gowing thotë se kudo nëpër Shqipëri mund të shohësh kukulla prej pellushi, të varura përpara ndërtimeve të ndryshme, qofshin shtëpi ose biznese, të cilat në shqip i quajnë thjesht majmunë.
Por përse i varin shqiptarët? Ka lidhje me fenë?
“Përgjigja që vjen nga myslimanë apo katolikë është e njëjtë: feja nuk është e rëndësishme. Pronarët e shtëpive e pranojnë: është diçka më serioze: majmunët i mbrojnë nga syri i keq”.
Dikush i thotë gazetares se syri i keq mund të çajë një gur në dysh, aq i fuqishëm është. Madje një usta, që ka punuar edhe në Londër, thotë se beson shumë te syri i keq.
“Nuk e kisha varur majmunin te godina dhe erdhi policia. Po më shkaktonin probleme. Djali im shkoi dhe e bleu një majmun dhe tani nuk kemi më probleme”.
Gazetarja thotë se askush nuk di të shpjegojë se nga erdhi ideja fillestare, por ka ardhur pas rrëzimit të komunizmit. Ajo shton se edhe hudhrat përdoren kundër syrit të keq, por edhe kafkat e disa kafshëve.
"Këta majmunë janë idhujt e kapitalizmit. Më të fuqishëm se feja, madje edhe se nacionalizmi, në atë që dikur ishte një shtet ateist. Një nga shtëpitë që kam vizituar është në pronësi të një minatori në pension. Shtëpia e tij mbrohet nga një majmun gri, sa një fëmijë i vogël."
/agjencia e lajmeve “Dyrrah”/
