·       Artistja nuk i përfytyron dot veprimet kaq bujare të këtij burri, por pranon se është e magjepsur nga Shqipëria dhe shqiptarët

22 korrik 2015 –  Biznesmeni shqiptar jep një kabriolet për xhirim video-klipi në rrugët e ngushta të qyteteve muzeore dhe kur ia kthejnë, ai ia dhuron këngëtares bukuroshe ukrainase, e cila refuzoi.

Një ngjarje e pazakontë e dyfishtë ka bërë bujë në mediet rozë ukrainase që flasin për xhirimet e një video-klipi në Shqipëri të këngëtares së njohur 31-vjeçare Anna Dobrydneva. Duke lënë pas karrierën në një duet, ajo vazhdon të pushtojë shou-bizin fillikate. Kohët e fundit u kthye nga Shqipëria, ku për 12 ditë pushoi dhe xhiroi një video të re. Pikërisht se si do të jetë videoja e re, artistja e mban sekret, por vetëm vë në dukje se po përgatitur për adhuruesit diçka madhështore.

Regjisori i videos Vlad Koçatkov (Kochatkov) i sugjeroi Anës që klipin ta xhironin në një vend të pazakontë. “Ky është një vend tepër i bukur – thotë Kochatkov – dhe për mua, si regjisor, është zbulim i vërtetë. Jam i sigurt se shumë njerëz, pasi të shohin këtë video, nuk do ta kuptojnë menjëherë se ku është xhiruar”.

Këngëtares i pëlqen të ngasë vetura, sidomos kabriolete. Në një nga ditët e lira nga xhirimet, kompania, së cilës i përkiste artistja, e njohu me një biznesmen vendas, i cili me mirësjellje ofroi kabrioletin e tij me ngjyrë të zezë me qëllim që ekipi i xhirimit të kishte mundësi të lëvizte nëpër rrugicat e vjetra të qyteteve të lashta shqiptare.

“Kur shkuam te pronari i kabrioletit për t’i kthyer makinën, – tregon regjisori, – ai nuk ia shqiste sytë Anës. Kaq shumë i kishte pëlqyer, sa që biznesmeni donte t’ia dhuronte veturën këngëtares. Ne shkuam për ta falënderuar, kurse ai ishte i gatshëm të hiqte dorë nga makina e tij. Vërtet, Ana nuk e pranoi një dhuratë të tillë të shtrenjtë”.

Këngëtarja, nga ana tjetër, nuk i përfytyronte dot veprimet kaq bujare të këtij burri. Ajo pranon se është e magjepsur nga vendi dhe banorët e saj. “Shqiptarët janë një popull i përzemërt dhe i sinqertë, – nënvizon artistja, – jam e impresionuar nga bukuria e arkitekturës së lashtë, ngrohtësia e Adriatikut dhe Jonit, kuzhina jashtëzakonisht e shijshme. Me që ra fjala, këtu nuk përdorin plehra kimike dhe përshpejtues rritjeje, prandaj të gjitha produktet kanë aromë marramendëse. U rekomandoj që të gjithë adhuruesve të ushqimeve të veçanta të vijnë në Shqipëri për t’u kënaqur me larminë dhe karakterin natyror të shijeve”.

Gjithsesi mbetet enigmë emri i këtij biznesmeni që fal një kabriolet.

/th. m. agjencia e lajmeve “Dyrrah”/