“Nëna me hemorragji cerebrale dhe Covid, askush s’u kujdes për të”, spitali i Durrësit: Pacientja ndodhet në kujdesin e mjekëve

Mbrëmjen e të enjtes, emisioni “Stop” në Tv Klan paraqiti denoncimin e një qytetari nga Durrësi që thoshte se ka patur nënën e sëmurë, dyshonte se kishte ishemi cerebrale edhe Covid, të cilën e dërguar në spital dhe nuk i kanë dhënë ndihmë mjekësore.

Me anë të një videoje, denoncuesi tregonte se nënën e ka çuar në spital që në orën 21:00 në mbrëmje, por dhe pse është mëngjesi i ditës tjetër e kanë lënë të presë në korridoret e urgjencës në gjendje të rëndë shëndetësore.

“Kam sjell nënën mbrëmë në orën 21:00 në Spitalin e Durrësit, ka pësuar hemorragji cerebrale dhe dyshojmë dhe për Covid. Tani është ora 11:00 dhe siç e shihni askush nuk e merr përsipër, po presim përgjigjen e tamponit që nuk e kanë bërë akoma. Se kur do e bëjnë dhe kur do vijë përgjigja, ne po rrimë në korridoret e spitalit të Durrësit”, thotë ai.

Në lidhje me këtë rast, ka reaguar edhe Spitali Rajonal Durrës përmes një postimi në faqen zyrtare të Facebook, ku sqaron se të sëmurës i janë kryer të gjitha ekzaminimet e nevojshme, duke përfshirë edhe testin e shpejtë për koronavirus.

Sipas njoftimit të spitalit, pacientja ndodhet e shtruar në pavionin covid ku vijon të jetë në kujdesin e mjekëve.

POSTIMI I PLOTË

Lidhur me akuzat për mungesë shërbimi për pacienten me inicialet Q.S., transmetuar nga emisioni investigativ STOP, Spitali i Durrësit sqaron opinionin publik si vijon:

Pacientja me inicialet Q.S., u paraqit në urgjencën e spitalit të Durrësit në orën 22:16, të datës 11.02.2021, me ankesa për dhimbje koke, e dobesi te theksuar, ndërsa familjarët referuan se pacientja kishte kaluar me herët hemoragji cerebrale.

Pasi është vizituar nga mjeku i urgjencës, pacientja ka kryer skaner koke, panelin e analizave dhe konsultë neurologu.

Mjeku ka vlerësuar nevojën e kryerjes së një tjetër skaneri, atë të mushkërive, nga ku ka rezultuar suspect covid.

Nisur nga sa më sipër, pacientja ka kryer në spital testin e shpejtë dhe më pas është shtruar në pavionin covid, ku vijon të jetë në kujdesin e mjekëve.

Spitali Rajonal i Durrësit siguron qytetarët se stafi mjekësor është në shërbim të pacientëve, 24/7 me përkushtimin maksimal për t’ju përgjigjur nevojave të qytetarëve në këtë periudhë të vështirë të pandemisë.