Në aeroportin ndërkombëtar “Hartsfield-Jackson” në Atlanta të Shteteve të Bashkuara, është shënuar një situatë paniku pas alarmit për një sulm të armatosur, që më vonë sipas zyrtarëve rezultoi një shkrepje aksidentale e një arme zjarri.
Qindra persona që ishin në terminal në këtë moment, vrapuan nga frika, 3 prej të cilave morën plagë të lehta nga shtyrja e turmës.
Agjentët e sigurisë në aeroport tregojnë se gjatë kontrolleve të bagazheve, në çantën e një personi u gjet një “send i ndaluar” Ndërsa oficeri hapi ndarjen e çantës që përmbante “sendin e ndaluar”, pasagjeri reagoi duke kapur armën e zjarrit e cila më pas bëri shkrepje aksidentale.
Më pas ai u largua nga zona, duke dalë me vrap nga aeroporti. Agjentët u përpoqën të shpjegonin që ishte një incident i izoluar, por paniku kishte përfshirë të gjithë aeroportin.
