Festa për 14-vjetorin e shtetësisë së Kosovës ka filluar edhe nga qielli. Mbi sheshet e Prishtinës u lëshuan parashutat me flamujt e Kosovës dhe flamurit kombëtar.
Mëngjesin e këtij 17 shkurti u ngrit edhe flamuri, në të cilën ceremoni mori pjesë Presidentja e Kosovës, Vjosa Osmani, kryetari i Kuvendit, Glauk Konjufca, kryeministri Albin Kurti, ministri i Mbrojtjes, Armend Mehaj dhe komandanti i FSK-së, Bashkim Jashari.
Në nder të 14-vjetorit të pavarësisë janë organizuar një sërë aktivitetesh ku krerët shtetëror kanë nisur në mëngjes me homazhet në kompleksin memorial në Prekaz, pastaj tek varri i ish presidentit të Kosovës, Ibrahim Rugova, veprimtarit, Adem Demaçi.
Në orën 11:00 Kuvendi i Kosovës do të mbajë seancë solemne për nder të ditëlindjes së 14-t të pavarësisë së Kosovës.
Në orën 12:00 në sheshin “Nënë Terëza” do të bëhet parakalimi i kuadrateve të FSK-së dhe të Policisë së Kosovës. Paraprakisht do të ketë fjalime nga presidentja Osmani dhe kryeministri Kurti.
Shpallja e Pavarësisë së Kosovës është bërë më 17 shkurt të vitit 2008 në orën 15:39 në Kuvendin e Republikës së Kosovës. Në një mbledhje të jashtëzakonshme ku merrnin pjesë 109 deputetë nga gjithsej 120, Kuvendi i Kosovës shpalli njëzëri Kosovën shtet të pavarur, sovran dhe demokratik.
Deklarata e pavarësisë së Kosovës dhe shpallja e pavarësisë ishte bërë nga kryeministri i atëhershëm i Kosovës, Hashim Thaçi, ndërsa president atë kohë ishte Fatmir Sejdiu.
