Kryetari i Partisë Demokratike, Sali Berisha ka dalë ditën e sotme në komunikimin e përjavshëm me mediat, ku ka folur dhe për protestën e paralajmëruar për t’u mbajtur më 7 korrik.
Berisha u shpreh se një koalicion i madh do të dalë për të protestuar në Tiranë, ndërsa nuk i kurseu sulmet dhe për bordet e ngritura nga qeveria për përcaktimin e çmimeve tavan të karburantit dhe ushqimeve.
“Protesta e 7 korrikut ka një rëndësi shumë të madhe jo si një protestë e PD-së, por si një protestë e mbarë qytetarëve shqiptarë. Nuk ka dyshim se roli i PD-së në organizimin e kësaj proteste është përcaktues, por PD shkon drejt kësaj proteste me një koalicion të gjerë me shoqërinë civile, personalitete publike dhe forca politike opozitare të vërteta parlamentare dhe jashtë parlamentare.
Nuk ka dyshim se problemi më kryesor është një lak në fytin e shqiptarëve që po shtrëngohet çdo ditë e më shumë nga çmimet stratosferike të bordeve komuniste të qeverisë së Edi Ramës. Unë mund t’u them shqiptarëve se bordet për llogari të qeverisë dhe të oligarkëve janë shndërruar në një mekanizëm gjakpirës, të cilët rrisin çmimet jashtë çdo lloj logjike tregu. Dy ditë më parë fuçia e naftës në bursë ka qene 108 dollarë, nafta në treg ka qenë mbi 2600 lekë. Një muaj më parë kur fuçia e naftës ishte 108 dollarë, çmimi i naftës në tregun shqiptar ishte 2240 lekë. Bordet janë bërë zëdhënëse të një shfrytëzimi të egër të qytetarëve shqiptarë”, tha Berisha.
