Ministria e Mbrojtjes ka dhënë detaje në lidhje me ndalimin e katër personave nga Çekia në uzinën e Poliçanit.
Në njoftim thuhet se dy prej tyre janë ndaluar brenda tuneleve pasi janë konstatuar lëvizje të dyshimta.
Ndërkohë në orët e drekës janë shoqëruar edhe dy bashkëjetueset e tyre të cilat kanë qenë duke qëndruar në distancë 1.5 km larg tuneleve jashtë perimetrit të rrethimit të repartit.
Njoftimi i plotë
Rreth orës 08:40 të mëngjesit të sotëm, tek një nga tunelet në Uzinën e Poliçanit, janë konstatuar lëvizje të personave të paidentifikuar.
Menjëherë Policia Ushtarake në bashkëpunim me Policinë e Shtetit kanë izoluar hyrjet e tuneleve të cilët janë pothuajse të gjithë komunikues me njëri tjetrin dhe pas kërkimeve kanë ndaluar dy persona me kombësi çeke.
Rreth orës 12:30 në distancë 1.5 km larg tuneleve jashtë perimetrit të rrethimit të repartit u konstatuan dhe shoqëruan edhe dy shtetase te kombësisë çeke, bashkëjetuese të dy shtetasve të mësipërm.
Personat e mësipërm janë ndaluar dhe aktualisht vazhdojnë procedurat nga autoritetet e sigurisë në vend.
