Një 34 vjeçar në Shkodër është proceduar penalisht pasi ka tentuar të kalojë në pikën kufitare të Muriqanit me 14.900 euro të cilat nuk i kishte të deklaruara.
Pas kontrolli të imtësishëm, brenda mjetit ‘Range Rover’, 34 vjeçarit, T.B iu gjet shuma e cila nuk ishte deklaruar sipas përcaktimeve ligjore në fuqi.
Njoftimi:
Muriqan/Goditet një rast i mosdeklarimit të të hollave në kufi.
Sekuestrohen 14.900 euro, procedohet penalisht 34-vjeçari që nuk i deklaroi në PKK Muriqan.
Shërbimet e Policisë Kufitare në Muriqan, në vijim të kontrolleve për goditjen e paligjshmërisë, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, automjetin tip “Range Rover”, me drejtues shtetasin T. B., 34 vjeç banues në fshatin Hot i Ri, Shkodër.
Gjatë kontrollit të ushtruar në automjetin e tij, shërbimet e Policisë Kufitare gjetën dhe sekuestruan 14.900 euro, të cilat ky shtetas nuk i kishte deklaruar sipas përcaktimeve ligjore në fuqi.
Në përfundim të veprimeve hetimore, specialistët e Seksionit për Hetimin e Krimeve Ekonomike dhe Financiare të DVP Shkodër referuan materialet në Prokurori dhe nisi procedimi penal në gjendje të lirë për shtetasin T. B., për veprën penale “Mosdeklarimi në kufi i të hollave dhe i sendeve me vlerë”.
Materialet iu referuan Prokurorisë pranë Gjykatës së Rrethit Gjyqësor Shkodër, për veprime të mëtejshme.
